Pages



>

Monday 2 February 2015

كيف تخططين لحفلة زفافك... #عروس 2015




How To Plan Your Wedding Party
كيف تخططين لحفل زفافك 


اغلب البنات يحلمون بيوم زواجهم والفستان والحفلة والديكور 
لكن هذا الموضوع يختلف من بنت لبنت 
في بنات تحب يكون بسيط وناعم وكلاسيكي  ويكون مختصر على المقربين منها 
وفي بنات يحبون الفخامه والجديد في كل شي ويحبون يسوون كل شي ما احد سواه قبلهم 
كل وحدة تسويه بالطريقة اللي تحبها وترتاح لها ويناسب ميزانيتها اللي مخططة لها 

اول شي في كم نصيحة مني من خلال تجربتي تذكروها :
  • لا تنسين ترددين "اللهم لا سهل الا ما جعته سهلا وانت تجعل الحزن ان شئت سهلا""رب اشرح لي صدري و يسر لي امري " طول الوقت ..
  • إذا فيه محل شفتي شغله وعجبك احجزي عنده ولا تغامرين او تختارين شي مومعروف لانه الارخص 
  • لا تسالين او تشاورين كثير لانه بيوترك ويخربطك اكثر اختاري شخص او ٢ من اللي تثقين في ذوقهم كفاية 
  • لا تستحين  تسالين احد عن شي عجبك يمكن تلقين شي يناسبك اكثر  اسالي وشوفي  المحلات الموثوقه المجربه 
  • لا تقولين كل شي في زواجك لانه ممكن ما يكون بالطريقة المتوقعه لا سمح الله وكمان حلو تخلين فيه عنصر المفاجاه  ما يكونون الضيوف عارفين كل شي  
  • قسمي المهمات بينك وبين اخواتك او اي احد لو كان فيه مجال عشان ما تكونين مضغوطه وتنجزين اسرع 
  • بالنسبه لي اهم شي شكل العروسة يوم الزواج(الشعر / المكياج / الفستان ) لان هو اللي بيبقالك  بالصور 
  • نصيحة كل اللي حولي نصحوني فيها  وكان معاهم حق فيها.. لا تختارين صرعات موضه او اشياءجريئة بزيادة  لان بعد سنوات لما تشوفين صورك راح تندمين  وتقولين ليه سويتها وتحسينها غريبه ..نصيحة  اختاري كل شي ناعم كلاسيكي طبيعي  وراقي اهم شي (ما يقدم مع الوقت ويبان غريب)
واهم  شي اهم شي .....
  • لا تسوين شي مو مقتنعة فيه 


انتبهي 

العروسة وقت الاختيار ترتبك وتحتار مهما كانت عندها اطلاع وحب للموضة  
اهم شي تقتنعين انتي  اذا ما حبيتيه من الاول لا توافقين فكري بعدين قرري 


الحين نبدأ فيي الخطوات :


الخطوة الاولى


استلهام واختيار اطلالتك ليوم زفافك 

اول شي تتفرجين على صور قد ما تقدرين فساتين  وشرعات  واكسسوارات  للشعر ومكياج وشعر ومسكات 
 واجمعي صور وفكري لا تقررين بسرعه 
هذا الحساب في الانستقرام  ممكن يساعدك كمان 

WEDDING_Blog

وروحي محلات فساتين زواجات لو تبين جاهز  فيه محل  رهيد ومحل pronovias

او اذا فيه موديل في بالك في مشاغل كبيرة مثل عالم وسام  وفيه بنات تطلب اون لاين  

بعض المواقع الموثوقه :




راح انزل بوست كامل صور افكار اطلالات للعروس  ان شاءالله

بالنسبة ل الميك اب ارتست .. اهم شي تكون فاهمه ومكياجها ناعن طبيعي  وحلو في التصوير ..

وهذي حسابات ميك اب ارتست  من الانستقرام شغلهم حلو
AinMakeupArtist
RubyFotouni
WaadMakeupArtist
I.DYM

الشعر دايما فيه موضه معينه يكونون هابين فيها 
مثلا الحين  دارج اكثر الشعر المفكوك اكثر من الرفعات  كلهم حلوين بس اهم شي تختارين اللي يناسبك 
اذا تعرفين وحدة كويسه ،تعجبك احجزيها عشان تكونين مرتاحة وماتخافين  او جربيها في مناسبه قبل زواجك ممكن 

وهذي بعض حسابات الشعر 
NabilaHair
Ebtssam_hair
Hairstyles_by_may

الخطوة الثانية




اول شي  لازم دفتر تسجلين فيه او برنامج في الجوال تسجلين فيه اللي سويتيه واللي خلصتي منه 
الطريقة اللي تريحك  ليه ضروريه لان مارح تقدرين تتذكرين كل شي راح تنسين من كثرها 



الخطوة الثالثة 


اول ترتيب من ترتيبات الزواج اللي ما تقدرين تسوين شي من غيره هو (حجز القاعة)
اسعار الكراسي تختلف من قاعه لقاعة لكن  تكون مابين ٣٠٠-٥٠٠ ريال للكرسي 
واغلب الفنادق  لا تقبل باقل من ٣٥٠ او ٢٥٠ كرسي  مع العشاء
حسب حجم القاعه ومكانها  
  • المكان المناسب :(فندق/قصر افراح /منزل) 
  • التاريخ المناسب : بالهجري والميلادي لازم تحفظينهم  الاثنين
  • العدد للمدعوين :عادة اذا دعيتي ٣٠٠ يحظر ٢٠٠ تقريبا يختلف بين العوايل لكن غالبا تعزمين اكثر من عدد الكراسي اللي حجزتيهم   ..
  • .الفنادق  يكون عدد المدعوين مع العشاء  اطلبي قايمة الاكل وشوفي اللي تناسبك  

  • اهم شي غرفة تجهيز العروس شوفيها بنفسك  اذا تناسب  وتكفي لاستديو التصوير 
  • قابلي المشرفه اللي راح ترتب معاك وخذي رقمها راح تحتاجينها طول الوقت 





الخطوة الرابعة   

الحجوزات 

حجز المكياج والشعر والمنكير والمصورات ب للعروس وافضل تكون مختلفين عن اللي بتسوي اهلك عشان لو صار ظرف لوحدة تكون فيه بديلة 
وافضل لو تعطينهم عربون اضمن لك  ويكون من الساعه ٤ العصر وقت مناسب عشان مايخرب ويمديك تصورين 
والفستان  والشرعة  تكونين مختارتهم تطلبينهم او تبدين خياطتهم  عشان يمديك الوقت 

المصورات ممكن تحجزين استديو مثل:
استديو بنات
استديو جلامور شوتس
استديو  كاتيليا
استديو لونا

حسابات مصورات 
WHITE_NIGHT_STUDIO
SALMAJAMMAL
MANAL_WEDDINGS
REEMBAJABAA

الخطوة الخامسة


حجز الفنان او الفنانه او فرقة الاعراس  اللي اخترتيهم واهم شي تكونين سامعتهم قبل لا تغامرين 

وقبل الزواج تعطينه قائمة  الاغاني اللي تبغون يغنيها  افضل 

الخطوة السادسة 

اختيار الكوشه والديكور










المحلات كثيرة المستويات والاسعار تتفاوت لكن اهم شي يكون المحل مريح وحريصين 
مايكون همهم الفلوس وبس 
روحي وشوفي كثير واختاري الي يناسبك ويكون ثقه 
وعادة تكون المسكة وزينة الحمامات مجانا 

وهذي حسابات مصممين حفلات موثوقين  تتفاوت اسعارهم


NasheedEvents
Stars_wedding
laceEvents
Mohamad_nayafa
art_concert
cermonia
Huda _planner
partyflowersa

الخطوة السابعة 

اختيار الزفة

بعد ما تختارينها  ،تعرفين من المشرفه كم دقيقة يناسب مساحة القاعه 
تاخذين السيدي وتسوين بروفا في القاعه عليها اذا يبغالها تعديلات 
وبعدها تاخذين نسختين او ٣ من السيدي  احتياط 

الخطوة الثامنة

التقديم والضيافة 


 حجز الصبابات والحلويات 
بعض  محلات الكوش  موجودة عندهم خدمة الضيافه  
بس المحلات كثير اهم شي التوصيل للقاعة  والمحلات تساعدك كم كيلو تحتاجين
انتبهي  من الشوكالاتة الغير مغلفة في الصيف تذوب 

الخطوة التاسعة 

اختيار الكيك وبطاقات الدعوة
الكيك :
قبل اسبوعين من زواجك
اختاري محل يوصل للقاعة
طبقة وحدة كفايه والباقي يكون فلين 
اوفر وحفظ للنعمة كمان الناس ماصارت تاكل من الكيكة صارت ديكور اكثر 

البطاقات :
اختاري الاوفر والابسط لانه مارح تستفيدين منها بس تكون انيقة ومرتبه 
فيه محلات تكون للتغليف ومكتوب عليها بطاقات 
اسعارها تكون معقولة 
لكن اذا تحبين تكون فخمه في مطابع الهلال من افضل المطابع في الرياض


الخطوة العاشرة  والاخيرة 

بقايا الأكل

مافي احلي من انك تاخذين اجر بيوم زواجك وبنية التوفيق 
اتصلي علي شركة من شركات كثير تجمع بقايا الاكل 
وراح ياخذون الباقي  للمحتاجين 

مثل شركة إطعام 
http://saudifoodbank.com

اتمنى يكون البوست فادكم لو شوي
واتمنى لكل العرايس  التوفيق والسعادة يارب 
واذا عندكم حسابات ناس جربتوهم اكتبوها في الكومنت عشان الكل يستفيد 



مدونة روز جولد 

2 comments :

  1. موضوع شامل و متكامل ما شاء الله عليكي
    يعطيكي الف عافية ♥

    ReplyDelete
  2. يعطيك العافية

    ReplyDelete